«PSJ» bosh murabbiyi Luis Enrike Chempionlar Ligasi finali oldidan parijliklar va Londonning «Arsenal» jamoasi o‘yin uslubi haqida fikr bildirdi.

Turnirning hal qiluvchi bahsi 30 may kuni Vengriyaning Budapesht shahridagi «Pushkash Arena» stadionida bo‘lib o‘tadi.

Enrikening ta’kidlashicha, ikki jamoa bir-biriga mutlaqo qarshi uslubda o‘ynaydigan raqiblar emas.

«Menimcha, bu ikki jamoa bir-biriga qarama-qarshi emas. «Arsenal» — Mikel Arteta uslubida qurilgan jamoa. U aniq ravishda Xosep Gvardiolaning to‘p nazoratiga asoslangan futbol g‘oyasidan ilhomlangan. Jamoa juda yuqori raqobatbardoshlikni namoyish qilmoqda — bu Mikelning shaxsiyatini ko‘rsatadi.

«Arsenal» — Yevropadagi eng yaxshi himoyalanadigan jamoa va bu bir necha yildan beri shunday. Bu hayratlanarli uyg‘unlik. Jamoa bitta futbolchiga bog‘liq emas. Ular standart vaziyatlardan ko‘p gol uradi va ishonchli himoyani yuqori samaradorlik bilan uyg‘unlashtira oladi.

Kimdir «Arsenal» jamoaviy gollar urmaydi, deyishi mumkin — lekin buning ahamiyati bormi? «Arsenal» muxlisidan so‘rang, ishonchim komilki, u jamoasidan mamnun bo‘ladi. Ular Premyer-ligada chempion bo‘lishdi va men ularni tabriklayman. Buni mavsum boshidanoq munosib tarzda qo‘lga kiritishdi.

Bizda ham o‘xshashliklar bor: biz ham «Arsenal» kabi kuchli jihatlarimizdan maksimal foydalanishga harakat qilamiz. Buning uchun to‘pni nazorat qilishimiz va maydonda o‘zimizni ko‘rsatishimiz kerak. Biz ham standart vaziyatlardan gol ura olamiz, ammo bizga futbolchilar o‘rtasidagi o‘zaro harakat orqali to‘pni nazorat qilish, raqib himoyasini yorib o‘tish yo‘llarini izlash yoqadi — va buni jamoaviy tarzda bajarish kerak.

Bizning futbolchilar individual jihatdan yorqinroq, ammo ular ham bir butun jamoa sifatida harakat qilishadi. Menimcha, bu yerda ikki buyuk jamoa to‘qnash kelmoqda — «Bavariya» bilan birga bu Yevropaning eng yaxshi uch jamoasi. Bu esa bizdan moslashuvni talab qiladi: agar «Arsenal»ni mag‘lub etmoqchi bo‘lsak, odatdagidan boshqacharoq hujum qilish va himoyalanishimizga to‘g‘ri keladi», — dedi Enrike UEFA rasmiy saytiga bergan intervyusida.