«ПСЖ» бош мураббийи Луис Энрике Чемпионлар Лигаси финали олдидан парижликлар ва Лондоннинг «Арсенал» жамоаси ўйин услуби ҳақида фикр билдирди.

Турнирнинг ҳал қилувчи баҳси 30 май куни Венгриянинг Будапешт шаҳридаги «Пушкаш Арена» стадионида бўлиб ўтади.

Энрикенинг таъкидлашича, икки жамоа бир-бирига мутлақо қарши услубда ўйнайдиган рақиблар эмас.

«Менимча, бу икки жамоа бир-бирига қарама-қарши эмас. «Арсенал» — Микель Артета услубида қурилган жамоа. У аниқ равишда Хосеп Гвардиоланинг тўп назоратига асосланган футбол ғоясидан илҳомланган. Жамоа жуда юқори рақобатбардошликни намойиш қилмоқда — бу Микелнинг шахсиятини кўрсатади.

«Арсенал» — Европадаги энг яхши ҳимояланадиган жамоа ва бу бир неча йилдан бери шундай. Бу ҳайратланарли уйғунлик. Жамоа битта футболчига боғлиқ эмас. Улар стандарт вазиятлардан кўп гол уради ва ишончли ҳимояни юқори самарадорлик билан уйғунлаштира олади.

Кимдир «Арсенал» жамоавий голлар урмайди, дейиши мумкин — лекин бунинг аҳамияти борми? «Арсенал» мухлисидан сўранг, ишончим комилки, у жамоасидан мамнун бўлади. Улар Премьер-лигада чемпион бўлишди ва мен уларни табриклайман. Буни мавсум бошиданоқ муносиб тарзда қўлга киритишди.

Бизда ҳам ўхшашликлар бор: биз ҳам «Арсенал» каби кучли жиҳатларимиздан максимал фойдаланишга ҳаракат қиламиз. Бунинг учун тўпни назорат қилишимиз ва майдонда ўзимизни кўрсатишимиз керак. Биз ҳам стандарт вазиятлардан гол ура оламиз, аммо бизга футболчилар ўртасидаги ўзаро ҳаракат орқали тўпни назорат қилиш, рақиб ҳимоясини ёриб ўтиш йўлларини излаш ёқади — ва буни жамоавий тарзда бажариш керак.

Бизнинг футболчилар индивидуал жиҳатдан ёрқинроқ, аммо улар ҳам бир бутун жамоа сифатида ҳаракат қилишади. Менимча, бу ерда икки буюк жамоа тўқнаш келмоқда — «Бавария» билан бирга бу Европанинг энг яхши уч жамоаси. Бу эса биздан мослашувни талаб қилади: агар «Арсенал»ни мағлуб этмоқчи бўлсак, одатдагидан бошқачароқ ҳужум қилиш ва ҳимояланишимизга тўғри келади», — деди Энрике УЕФА расмий сайтига берган интервьюсида.