Madridning «Real» klubi prezidentligiga nomzod Enrike Rikelme saylovoldi kampaniyasi davomida ikkita «yirik» transfer bo‘yicha kelishuvga erishganini ma’lum qildi. 37 yoshli tadbirkor Florentino Peres ustidan bo‘lajak saylovlarda g‘alaba qozongan taqdirda, ushbu ikkala bitim ham tasdiqlanishi va futbolchilar «qaymoqranglilar» safiga qo‘shilishini ta’kidlab o‘tdi.

Shuningdek, gap ilgari klubda ishlamagan (ya’ni Joze Mourinyo emasligi aniq) taniqli murabbiy bilan erishilgan kelishuv haqida ham ketmoqda. Cadena SER ma’lumotlariga ko‘ra, ikkala futbolchi va murabbiy Rikelmega ularning ismlarini oshkor qilishga ruxsat berishgan, biroq buni «iloji boricha kechroq» qilishni so‘rashgan.

«Real» prezidentligi uchun saylovlar 7 iyun kuni bo‘lib o‘tadi. Peres — Rikelme uchun yagona raqib hisoblanadi.