Мадриднинг «Реал» клуби президентлигига номзод Энрике Рикельме сайловолди кампанияси давомида иккита «йирик» трансфер бўйича келишувга эришганини маълум қилди. 37 ёшли тадбиркор Флорентино Перес устидан бўлажак сайловларда ғалаба қозонган тақдирда, ушбу иккала битим ҳам тасдиқланиши ва футболчилар «қаймоқранглилар» сафига қўшилишини таъкидлаб ўтди.
Шунингдек, гап илгари клубда ишламаган (яъни Жозе Моуриньо эмаслиги аниқ) таниқли мураббий билан эришилган келишув ҳақида ҳам кетмоқда. Cadena SER маълумотларига кўра, иккала футболчи ва мураббий Рикельмега уларнинг исмларини ошкор қилишга рухсат беришган, бироқ буни «иложи борича кечроқ» қилишни сўрашган.
«Реал» президентлиги учун сайловлар 7 июнь куни бўлиб ўтади. Перес — Рикельме учун ягона рақиб ҳисобланади.
