Londonning «Arsenal» klubi sobiq bosh murabbiyi Arsen Venger Mikel Artetaga Chempionlar ligasi finalida «PSJ»ga qarshi o‘yin oldidan maslahat berdi. «Kanonirlar» shu shanba, 30 may kuni o‘z tarixida ilk bor eng nufuzli yevrokubokni yutishi mumkin. Buning uchun turnirning amaldagi g‘olibini mag‘lub etish talab etiladi.

«Arteta odatda nima qilsa, o‘shani qilishi va xotirjamlikni saqlashga harakat qilishi kerak, garchi bu qanchalik qiyinligini bilsam-da. Futbolchilarga qat’iy ishonch bag‘ishlash zarur. Mikel buni qanday qilishni tushunadi va u o‘yinchilarni mendan ko‘ra yaxshiroq biladi. Butun mavsum davomida yordam bergan jamoaviy ruhni saqlab qolish juda muhim», – dedi afsonaviy fransuz murabbiyi.

Eslatib o‘tamiz, «Arsenal» ishtirokidagi avvalgi Chempionlar ligasi finali aynan 20 yil avval bo‘lib o‘tgan edi: o‘shanda Venger boshchiligidagi londonliklar «Barselona»ga 1:2 hisobida imkoniyatni boy berishgandi.