«PSJ» yarim himoyachisi Joau Nevesh faoliyatini Madridning «Real» klubida davom ettirishi mumkin. Bu haqda El Debate xabar bermoqda.

Manbaga ko‘ra, taniqli futbol agenti Jorje Mendesh «qirollik klubi»ga Neveshning transferini taklif qilgan. Ta’kidlanishicha, futbolchining o‘zi ham parijliklar safini tark etib, Madridga ko‘chib o‘tishga tayyor.

21 yoshli portugaliyalik futbolchi joriy mavsumda barcha turnirlarda 37 ta o‘yinda maydonga tushib, 7 ta gol urdi va 4 ta golli uzatmaga mualliflik qildi.

Neveshning «PSJ» bilan tuzgan shartnomasi 2029 yilga qadar mo‘ljallangan. Transfermarkt portali ekspertlari yarim himoyachini 110 million yevroga baholamoqda.