Yengil vazn toifasida UFC chempioni, 29 yoshli mag‘lubiyatsiz sportchi Iliya Topuriya yarim o‘rta vazn toifasi chempioni, 34 yoshli rossiyalik Islom Maxachevga bo‘lgan munosabatiga oydinlik kiritdi.
«Islom bilan jang qilamanmi yoki yo‘qmi — bu men uchun shaxsiy jihatdan hech narsani o‘zgartirmaydi, chunki men undan nafratlanmayman. Unga nisbatan shaxsiy adovatim yoki e’tirozlarim yo‘q. Gap shundaki, u ushbu sport turida aql bovar qilmas natijalarga erishdi. Xuddi men kabi, u ham ikki vazn toifasida chempion hisoblanadi.
Agar to‘qnash keladigan bo‘lsak, bizning jangimiz shubhasiz UFC tarixidagi eng buyuk voqealardan biriga aylangan bo‘lardi. Ammo bu jang hech qachon amalga oshmasa ham, men baribir o‘zim va erishgan yutuqlarim bilan faxrlanaman hamda baxtli bo‘laman. O‘zimni to‘laqonli va baxtli his qilishim uchun menga Islom bilan jang shart emas», — deya Topuriyaning so‘zlarini keltirdi KirmiziKoseMMA.
