«Arsenal» bosh murabbiyi Mikel Arteta jamoasining o‘yin uslubiga qaratilgan tanqidlar yuzasidan o‘z fikrlarini bildirib o‘tdi.

— Chempionlar ligasi yarim finalida «Atletiko» ustidan qozonilgan g‘alabadan keyin sizni haddan tashqari ko‘p himoyalanishda ayblashdi. Bunday tanqidlarga qanday qaraysiz?

— Men har qanday fikrga hurmat bilan qarayman. Ular bilan nima qilishni o‘zingiz hal qilishingiz kerak: ularga ahamiyat berish, e’tiborsiz qoldirish, xotira sifatida saqlash, yo‘q qilish yoki o‘z foydangizga ishlatish... Bu yerda hammasi bor. Mening ishim shundan iboratki, agar g‘alaba qozonish uchun bizga nimadir yetishmayotgan bo‘lsa, men bundan qoniqish hosil qila olmayman. Mening vazifam – g‘alabaga erishishning turli yo‘llarini izlash, innovasiyalar yaratish, avvalgilaridan farq qiladigan yondashuvlarni topish. Hozirgacha aynan shuni qilib kelyapmiz.

— Raqiblaringizning past blokda himoyalanishiga qarshi kurashish uchun yangi yo‘llar izladingizmi?

— Jarohatlarni hisobga olsak, har bir narsaning o‘z vaqti bor. Agar men jarohatlar haqidagi ma’lumotlarni kompyuterga kiritib, «Premyer-ligada g‘alaba qozonish imkoniyatlarimiz qanday?» deb so‘raganimda, menga 2 foizlik imkoniyat berishgan bo‘lardi. Ammo men taslim bo‘lmoqchi emasdim. Biz o‘tkazgan 60 dan ortiq o‘yinda raqobatbardosh bo‘lishimiz uchun bor imkoniyatlarimizdan va sifatlarimizdan foydalanib, boshqa yo‘llarni izlashga majbur bo‘ldik, — dedi Arteta.