Ispaniyalik mutaxassis Michel Sanches «Jirona» bosh murabbiyi lavozimini tark etdi. Bu haqdagi ma’lumot klubning rasmiy saytida e’lon qilindi.

«Klub murabbiyga o‘z ishiga bo‘lgan sadoqati, maqsad sari intilishi va professionalizmi uchun, shuningdek, o‘yinchilar, muxlislar, rahbariyat va klubning barcha xodimlariga nisbatan insoniy, e’tiborli va hurmatli munosabati uchun chin dildan minnatdorchilik bildiradi», — deyiladi «Jirona» bayonotida.

Michel Sanches «Jirona»ni 2021 yildan buyon boshqarib kelayotgan edi. Uning qo‘l ostida klub erishgan eng yaxshi natija 2023/2024 yilgi mavsumda La Ligada qo‘lga kiritilgan bronza medallari bo‘ldi. Eng omadsiz natija esa joriy mavsumda qayd etildi — jamoa 19-o‘rinni egallab, elita divizionini tark etdi.