Испаниялик мутахассис Мичел Санчес «Жирона» бош мураббийи лавозимини тарк этди. Бу ҳақдаги маълумот клубнинг расмий сайтида эълон қилинди.
«Клуб мураббийга ўз ишига бўлган садоқати, мақсад сари интилиши ва профессионализми учун, шунингдек, ўйинчилар, мухлислар, раҳбарият ва клубнинг барча ходимларига нисбатан инсоний, эътиборли ва ҳурматли муносабати учун чин дилдан миннатдорчилик билдиради», — дейилади «Жирона» баёнотида.
Мичел Санчес «Жирона»ни 2021 йилдан буён бошқариб келаётган эди. Унинг қўл остида клуб эришган энг яхши натижа 2023/2024 йилги мавсумда Ла Лигада қўлга киритилган бронза медаллари бўлди. Энг омадсиз натижа эса жорий мавсумда қайд этилди — жамоа 19-ўринни эгаллаб, элита дивизионини тарк этди.
