«Sporting» himoyachisi Maksi Arauxoga Angliya Premyer-ligasining bir qator top-klublari qiziqish bildirmoqda. A Bola nashrining xabar berishicha, 26 yoshli urugvaylik futbolchiga «Arsenal», «Manchester Yunayted» va «Chelsi» jamoalari ko‘z tikkan. Biroq Lissabon klubi futbolchi bilan xayrlashish niyatida emas va unga yaxshiroq shartlar asosida yangi shartnoma taklif qilishga tayyor.
Arauxoning amaldagi shartnomasida tovon puli 80 million yevro etib belgilangan. Endi barchasi futbolchi «Sporting» bilan shartnomani uzaytirishga rozi bo‘lish-bo‘lmasligiga bog‘liq. Manbaning qo‘shimcha qilishicha, APLga o‘tish futbolchi uchun jozibali variant bo‘lishi mumkin, chunki u ayni damda faoliyatining cho‘qqisida.
Transferga, ayniqsa, chap qanot himoyasini kuchaytirishga intilayotgan «Manchester Yunayted» katta qiziqish bildirmoqda. Arauxo Lyuk Shouning potensial o‘rinbosari sifatida ko‘rilmoqda. Joriy mavsumda urugvaylik futbolchi 13 ta samarali harakat (gol va assist) qayd etib, Portugaliya chempionatidagi eng samarali qanot himoyachilaridan biriga aylandi.
