Myunxenning «Bavariya» klubi «Yuventus» hujumchisi Dushan Vlaxovichga bo‘lgan qiziqishni qayta tikladi. Katta ehtimol bilan, 26 yoshli futbolchi bir oydan so‘ng yakuniga yetadigan «keksa sinyora» bilan shartnomasini uzaytirmaydi.

Tuttosport nashri xabariga ko‘ra, «Bavariya» allaqachon Vlaxovich bilan aloqaga chiqqan va uni erkin agent sifatida tarkibga qo‘shib olish imkoniyatini ko‘rib chiqmoqda. Myunxenliklar serbiyalik hujumchida Xarri Keyn uchun ishonchli o‘rinbosarni ko‘rishmoqda.

Dushan Vlaxovich uchun da’vogarlar orasida «Nyukasl» va «Napoli» klublari ham bor. Eslatib o‘tamiz, ushbu forvard o‘tgan mavsumda «Yuventus» safida barcha turnirlarda 23 ta uchrashuv o‘tkazib, 10 ta gol va 2 ta golli uzatmaga mualliflik qildi. U 2022 yil boshidan buyon «byankoneri» sharafini himoya qilib kelmoqda.