«PSJ» futbolchilari Chempionlar ligasida g‘alaba qozongan taqdirda salmoqli mukofot pullariga ega bo‘lishadi. Parijliklar 30 may kuni turnir finalida «Arsenal» bilan to‘qnash kelishadi.

«L’Équipe» ma’lumotlariga ko‘ra, g‘alaba uchun mukofot puli har bir o‘yinchiga taxminan 1 million yevroni tashkil qiladi. O‘tgan yili parijlik klub «Inter»ni (5:0) mag‘lub etib, Chempionlar ligasida g‘olib chiqqanida ham aynan shunday summa to‘langan edi.

Ta’kidlanishicha, Yevropaning ko‘pgina top-klublarida bo‘lgani kabi, bonuslar mavsum boshida kelishib olingan. «PSJ» rahbariyati bilan muzokaralarni jamoaning to‘rt nafar sardori — Markinyos, Ashraf Hakimiy, Usmon Dembele va Vitinya olib borgan.

Liga 1 ga keladigan bo‘lsak, parijliklarga bonuslar faqat chempionatdagi g‘alaba uchun to‘lanadi. Xuddi shunday mantiq Chempionlar ligasida ham amal qiladi. Chorak yoki yarim finallardan keyin to‘lanadigan summalar «nisbatan ramziy» hisoblanadi. Asosiy mukofotlar faqat sovrinlar bilan birga keladi — klub rahbariyati fikricha, asosiy harakatlantiruvchi kuch pul emas, balki g‘alaba bo‘lishi kerak.