Madridning «Real» klubi vinger Vinisius Junior bilan mehnat shartnomasini faqat bir holatda — agar futbolchi klub taklif qilgan va uning moliyaviy talablaridan ancha past bo‘lgan shartlarga rozi bo‘lsagina uzaytirishga tayyor. Bu haqda El Chiringuito nashri xabar bermoqda.

Agar Vinisius hozirgi shartlarni rad etsa, «qaymoqranglilar» taklifni yaxshilash niyatida emaslar va futbolchi bilan xayrlashishga tayyor bo‘lishadi. Vinisiusning klub bilan amaldagi shartnomasi 2027 yilning iyun oyi oxirigacha mo‘ljallangan.

Vinisius 2018 yildan buyon «Real» sharafini himoya qilib kelmoqda. Yakunlangan mavsumda futbolchi klub safida barcha turnirlarda 53 ta o‘yin o‘tkazib, 22 ta gol urdi va 12 ta golli uzatmani amalga oshirdi. Transfermarkt portali ma’lumotlariga ko‘ra, Vinisiusning transfer qiymati 150 million yevroni tashkil etadi.