«Malyorka» qanot hujumchisi Xan Virxili «Barselona»ga qaytishi mumkin. Bu haqda jurnalist Alfredo Martines xabar bermoqda.

Manbaning ma’lumotlariga ko‘ra, «ko‘k-anorranglilar» 19 yoshli futbolchini 7,2 million yevro evaziga qayta sotib olish huquqidan foydalanishni ko‘rib chiqmoqda. «Malyorka» La Ligadan tushib ketgani sababli, Virxilining shartnomasidagi tovon puli 30 milliondan 12 million yevrogacha pasaygan, bu esa o‘z navbatida qayta sotib olish summasining ham kamayishiga olib kelgan.

Ta’kidlanishicha, «Barselona» Virxilini sotib olib, keyinchalik uni qimmatroq narxga sotib yuborish yoki boshqa biror transfer kelishuviga qo‘shish uchun foydalanishi mumkin.

Yakunlangan mavsumda vinger barcha musobaqalarda jami 34 ta o‘yinda maydonga tushib, 2 ta gol urdi va 6 ta golli uzatmaga mualliflik qildi.