«Arsenal» muxlisi sifatida tanilgan britaniyalik mashhur boshlovchi Pirs Morgan «Tottenxem» va «Chelsi» muxlislarining tanqidlariga munosabat bildirdi. «Kanonirlar» Chempionlar ligasi finalida «PSJ»ga penaltilar seriyasida imkoniyatni boy berib, sovrinni qo‘lga kirita olmadi.

«O‘z mavsumlarini qanday o‘tkazganini ko‘rib, «Tottenxem» va «Chelsi» muxlislarining «Arsenal» ustidan kulishlari — bu aql bovar qilmaydigan holat. Biz Angliyadagi eng yaxshi jamoamiz va Yevropadagi ikkinchi eng kuchli jamoamiz. Sizlar esa butun dunyoga kulgi bo‘lasizlar. Shunday ekan, og‘zingizni yoping, keraksiz omadsizlar», — deb yozdi Morgan o‘z ijtimoiy tarmoqlarida.

Shuningdek, Morgan «Tottenxem» matbuot xizmatining Yevropa ligasi kubogi surati ostiga «Evropada g‘alaba qozonish — hamma uchun emas» deb yozilgan postiga ham munosabat bildirdi.

«Mening 61 yillik hayotim davomida «Tottenxem» na Premyer-ligani, na Birinchi divizionni yutgan», — deya javob qaytardi u.

Ma’lumot uchun, «Shporlar» so‘nggi bor 1961 yilda Angliyaning eng yaxshi jamoasi bo‘lgan edi.