Madridning «Real» klubi safiga uzoq tanaffusdan so‘ng Niderlandiya vakili — Denzel Dyumfris kelib qo‘shiladi. 2006-2009 yillar oralig‘ida «Qirollik klubi» bir yo‘la besh nafar niderlandiyalik futbolchini sotib olgan, biroq ularning hech biri kutilgan natijani ko‘rsata olmagan edi. Shundan so‘ng «qaymoqranglilar» go‘yoki «lolalar mamlakati» futbolchilaridan ko‘ngli qolgandek bo‘ldi.

Endi, oradan 17 yil o‘tib, bu «taqiq» bekor qilinmoqda: «Real» Milanning «Inter» klubidan Denzel Dyumfrisni sotib olishga bir qadam qoldi. 30 yoshli o‘ng qanot himoyachisi Ispaniya grandiga 20 million yevroga tushadi. Dyumfrisning o‘zi allaqachon transferga rozilik bergan. Yaqin vaqt ichida bitim rasman e’lon qilinishi kutilmoqda.

«Real» tomonidan sotib olingan so‘nggi niderlandiyalik futbolchi hozirgacha Klaas-YAn Xuntelar hisoblanadi – u 2009 yil boshida «Ayaks»dan xarid qilingandi.