Мадриднинг «Реал» клуби сафига узоқ танаффусдан сўнг Нидерландия вакили — Дензел Дюмфрис келиб қўшилади. 2006-2009 йиллар оралиғида «Қироллик клуби» бир йўла беш нафар нидерландиялик футболчини сотиб олган, бироқ уларнинг ҳеч бири кутилган натижани кўрсата олмаган эди. Шундан сўнг «қаймоқранглилар» гўёки «лолалар мамлакати» футболчиларидан кўнгли қолгандек бўлди.

Энди, орадан 17 йил ўтиб, бу «тақиқ» бекор қилинмоқда: «Реал» Миланнинг «Интер» клубидан Дензел Дюмфрисни сотиб олишга бир қадам қолди. 30 ёшли ўнг қанот ҳимоячиси Испания грандига 20 миллион еврога тушади. Дюмфриснинг ўзи аллақачон трансферга розилик берган. Яқин вақт ичида битим расман эълон қилиниши кутилмоқда.

«Реал» томонидан сотиб олинган сўнгги нидерландиялик футболчи ҳозиргача Клаас-Ян Хунтелар ҳисобланади – у 2009 йил бошида «Аякс»дан харид қилинганди.