«Real Sosyedad» vingeri Ander Barrenechea faoliyatini Angliya Premyer-ligasida davom ettirishi mumkin. Bu haqda jurnalist Ekrem Konur xabar bermoqda.

Manba bergan ma’lumotlarga ko‘ra, bir yo‘la uchta ingliz klubi 24 yoshli ispaniyalik futbolchining harakatlarini diqqat bilan kuzatib bormoqda. Gap «Arsenal», «Tottenxem» va «Aston Villa» klublari haqida ketmoqda.

Hozirgi vaqtda «kanonirlar» futbolchi uchun taxminan 30 million yevro atrofidagi dastlabki taklifni tayyorlashmoqda, biroq vingerning shartnomasida ko‘rsatilgan 75 million yevrolik tovon puli ushbu transfer uchun jiddiy to‘siq bo‘lishi mumkin.

Yakunlangan mavsumda Barrenechea barcha musobaqalarda jami 34 ta uchrashuvda maydonga tushib, o‘z hisobiga 4 ta gol va 5 ta golli uzatmani yozdirib qo‘ydi.