«Barselona» Ansu Fatini kelajakda ortga qaytarib olish imkoniyatini saqlab qolmoqchi.

Avvalroq, «Monako» vingerni 11 million yevroga sotib olmoqchi ekani va futbolchining o‘zi bilan kelishuvga erishgani haqida xabar berilgan edi. Biroq «blaugrana» shartnomaga o‘z tarbiyalanuvchisini qayta sotib olish opsiyasini yoki hech bo‘lmaganda keyingi sotuvdan ma’lum bir foiz olish bandini kiritmoqchi bo‘layotgani sababli transfer ishlari hali yakuniga yetkazilgani yo‘q.

Qayd etilishicha, «Barselona» monegasklar Fatini nisbatan arzon garovga sotib olib, keyinchalik uni kataloniyaliklarning raqobatchilariga qimmatga pullashini xohlamayapti.

Transfer kechikayotganining yana bir ehtimoliy sababi — Ispaniya chempionlari futbolchi uchun boshqa klublardan bundan ham yirikroq taklif tushishidan umid qilmoqda.