"Fiorentina" klubi bosh murabbiy Paolo Vanoli jamoani tark etganini e’lon qildi. U mavsumning o‘ta muvaffaqiyatsiz startidan so‘ng jamoani A Seriyadan tushib ketishdan saqlab qolishga muvaffaq bo‘lgan edi.

Mutaxassis 2025 yilning noyabr oyida iste’foga chiqarilgan Stefano Piolining o‘rnini egallab, "binafsharanglilar" boshqaruviga kelgandi. O‘sha paytda jamoa chempionatning dastlabki 10 ta turida birorta ham g‘alabaga erishmagan va duranglar evaziga bor-yo‘g‘i 4 ochko jamg‘arib, turnir jadvalining eng quyisida borayotgan edi. "Fiorentina" A Seriya tarixida dastlabki 15 ta o‘yinda biror marta g‘alaba qozonmay turib, yakunda ligada jon saqlab qolgan birinchi jamoaga aylandi.

Shunga qaramay, klub rahbariyati murabbiyga uzoq muddatli shartnoma taklif qilmadi va endilikda uning ketganini rasman tasdiqladi.

Italiya OAVlarining xabariga ko‘ra, Fabio Grosso "Fiorentina"ning yangi bosh murabbiyiga aylanishi kutilmoqda. U bundan avval "Sassuolo"ni B Seriyadan elitaga olib chiqqan va keyinchalik jamoaning A Seriya turnir jadvali o‘rtalaridan mustahkam joy olishiga yordam bergan edi.