Angliya terma jamoasi o‘rtoqlik uchrashuvida Yangi Zelandiyalik raqiblarini mag‘lub etdi (1:0). Shanba kuni AQSHda bo‘lib o‘tgan bahsda Xarri Keyn tomonidan 45-daqiqada kiritilgan gol o‘yinda yagona bo‘lib qoldi.

Ushbu g‘alaba «uch sherar» uchun bosh murabbiy Tomas Tuxel qo‘l ostidagi o‘ninchisi bo‘ldi. Opta portalining qayd etishicha, germaniyalik mutaxassisga bu ko‘rsatkichga erishish uchun 13 ta o‘yin kerak bo‘ldi. Bu terma jamoa tarixidagi ikkinchi natijadir — rekord esa 12 ta uchrashuvda 10 ta g‘alabaga erishgan Glenn Xoddlga tegishli.

Tuxel Angliya terma jamoasi boshqaruvini 2025 yilning boshida o‘z qo‘liga olgan edi. 52 yoshli murabbiyning Angliya Futbol assosiasiyasi bilan amaldagi shartnomasi 2028 yilning o‘rtalariga qadar mo‘ljallangan.