Madridning «Real» klubi «sosyos»larining (klub a’zolari) bir qismi ayni soatlarda bo‘lib o‘tayotgan saylovda «qaymoqranglilar» prezidentligiga nomzod Enrike Rikelmega ovoz berish jarayonida hushtaklar chalishdi. Shu bilan birga, ispan grandi muxlislaridan ba’zilari tadbirkorni olqishlagan. Bu haqda jurnalist Siro Lopes X ijtimoiy tarmog‘idagi o‘z sahifasida xabar berdi.

Manbaning ma’lumotiga ko‘ra, saylov uchastkasida «Real» a’zolaridan biri Rikelmega qarata «Yolg‘onchi» deb baqirgan.

Eslatib o‘tamiz, avvalroq Rikelme agar saylovda g‘alaba qozonsa, «Qirollik klubi» «Liverpul» sobiq murabbiyi Yurgen Klopp bilan bog‘lanishini ma’lum qilgan edi. Keyinchalik germaniyalik mutaxassisning agenti Klopp «Real»da ishlashni rejalashtirmayotganini bayon qilgan.