«Barselona» klubi yozgi transfer oynasida o‘ng qanot himoyachisi Jyul Kunde bilan xayrlashishga tayyor. Kataloniya klubi fransiyalik futbolchini sotuvga qo‘ydi, deb xabar bermoqda «Transfer News Live» nashri «El Nacional»ga tayanib.

«Ko‘k-anorranglilar» 27 yoshli o‘yinchining transferidan taxminan 80 million yevro ishlab olishni rejalashtirishmoqda. Vaziyatni Angliya Premyer-ligasining nomi oshkor etilmagan bir nechta vakillari diqqat bilan kuzatib borishmoqda.

«Transfermarkt» portali ekspertlari Jyul Kundening bozor qiymatini 60 million yevroga baholashgan. O‘tgan yilning avgust oyida futbolchi «Barselona» bilan shartnomasini 2030 yilga qadar uzaytirgan edi. Ortda qolgan mavsumda himoyachi Xans-Diter Flik jamoasi safida 47 ta o‘yinda maydonga tushib, 3 ta gol va 4 ta golli uzatma (assist) muallifiga aylandi.