«Barselona» klubining butun infratuzilmasi va «Kamp Nou» stadionini rekonstruksiya qilish loyihasi jiddiy moliyaviy qiyinchiliklarga duch keldi. Bu haqda «Marca» nashri xabar bermoqda.

Avvalroq ajratilgan mablag‘ rejalashtirilgan barcha ishlarni yakunlash uchun yetmay qolishi mumkin. Manbaning bergan ma’lumotlariga ko‘ra, Joan Laporta boshchiligidagi «Barselona» rahbariyati «Goldman Sachs» banki tomonidan taqdim etilgan 1,45 milliard yevrolik kredit liniyasi deyarli tugaganini, loyihaning amalga oshirilishi esa hali yakundan ancha yiroq ekanligini tan olgan.

Shu munosabat bilan, klub moliyalashtirish hajmini oshirishga ruxsat olish uchun o‘z a’zolariga (sosios) murojaat qilish imkoniyatini ko‘rib chiqmoqda. Ushbu masala joriy yilning iyul oyida o‘tkazilishi rejalashtirilayotgan navbatdan tashqari umumiy yig‘ilish kun tartibiga kiritilishi kutilyapti.

Hozirgi vaqtda ishlar nafaqat «Kamp Nou» stadionining o‘zida, balki «Espai Barça» loyihasining boshqa ob’ektlarida, jumladan, «Palau Blaugrana» arenasi va sobiq «Les Korts» stadioni yaqinidagi hududlarda ham davom etmoqda.

Ayni paytda bosh arenaning rekonstruksiyasi «1C» bosqichidan o‘tdi, buning evaziga stadion sig‘imi 62 657 tomoshabingacha oshirildi. Hozirda asosiy e’tibor ikkita VIP-yarus va tribunalarning uchinchi qavatini qurishga qaratilgan. Taxminan 9400 ta VIP-o‘rindiq yaratishni nazarda tutuvchi joriy bosqich 2027 yilning yozida yakunlanishi kerak.

Shundan so‘ng loyihaning eng murakkab qismi — tom qismini montaj qilish va konstruksiyaning kompression halqalarini qurish boshlanadi. Ishlarning yakuniy bosqichi olib borilayotgan vaqtda «Barselona» ma’lum muddatga (2027/28 yilgi mavsum boshida) stadionni vaqtincha tark etishiga to‘g‘ri kelishi mumkin. Jamoa ushbu davrda uy uchrashuvlarini qayerda o‘tkazishi bo‘yicha yakuniy qaror hali qabul qilinmagan.