«Барселона» клубининг бутун инфратузилмаси ва «Камп Ноу» стадионини реконструкция қилиш лойиҳаси жиддий молиявий қийинчиликларга дуч келди. Бу ҳақда «Marca» нашри хабар бермоқда.

Аввалроқ ажратилган маблағ режалаштирилган барча ишларни якунлаш учун етмай қолиши мумкин. Манбанинг берган маълумотларига кўра, Жоан Лапорта бошчилигидаги «Барселона» раҳбарияти «Goldman Sachs» банки томонидан тақдим этилган 1,45 миллиард евролик кредит линияси деярли тугаганини, лойиҳанинг амалга оширилиши эса ҳали якундан анча йироқ эканлигини тан олган.

Шу муносабат билан, клуб молиялаштириш ҳажмини оширишга рухсат олиш учун ўз аъзоларига (сосиос) мурожаат қилиш имкониятини кўриб чиқмоқда. Ушбу масала жорий йилнинг июль ойида ўтказилиши режалаштирилаётган навбатдан ташқари умумий йиғилиш кун тартибига киритилиши кутиляпти.

Ҳозирги вақтда ишлар нафақат «Камп Ноу» стадионининг ўзида, балки «Espai Barça» лойиҳасининг бошқа объектларида, жумладан, «Палау Блауграна» аренаси ва собиқ «Лес Кортс» стадиони яқинидаги ҳудудларда ҳам давом этмоқда.

Айни пайтда бош аренанинг реконструкцияси «1C» босқичидан ўтди, бунинг эвазига стадион сиғими 62 657 томошабингача оширилди. Ҳозирда асосий эътибор иккита VIP-ярус ва трибуналарнинг учинчи қаватини қуришга қаратилган. Тахминан 9400 та VIP-ўриндиқ яратишни назарда тутувчи жорий босқич 2027 йилнинг ёзида якунланиши керак.

Шундан сўнг лойиҳанинг энг мураккаб қисми — том қисмини монтаж қилиш ва конструкциянинг компрессион ҳалқаларини қуриш бошланади. Ишларнинг якуний босқичи олиб борилаётган вақтда «Барселона» маълум муддатга (2027/28 йилги мавсум бошида) стадионни вақтинча тарк этишига тўғри келиши мумкин. Жамоа ушбу даврда уй учрашувларини қаерда ўтказиши бўйича якуний қарор ҳали қабул қилинмаган.