Portugaliyalik taniqli agent Paulu Barbozaning hisoblashicha, «An-Nasr» klubining 41 yoshli hujumchisi Krishtianu Ronaldu 2026 yilgi Jahon chempionatida Portugaliya terma jamoasiga foyda keltirmaydi. Ekspertning fikriga ko‘ra, milliy jamoaning o‘yini faqatgina yulduzli forvard atrofiga quriladi va bu holat jamoaning taktik imkoniyatlarini cheklab qo‘yadi.

«Krishtianusiz Portugaliya hujumda rang-barangroq o‘yin ko‘rsatadi, u bilan esa qarorlar qabul qilish doirasi torayadi. Shu sababli, Ronaldu hozirgi vaqtda jamoa uchun foydadan ko‘ra ko‘proq bosh og‘rig‘i, deb hisoblayman», — deydi ekspert.

Portugaliyaliklar mundialdagi yurishlarini 17 iyunga belgilangan DR Kongo terma jamoasiga qarshi o‘yin bilan boshlashadi. Guruh bosqichining qolgan ikki uchrashuvida Ronaldu jamoasi O‘zbekiston va Kolumbiya terma jamoalari bilan kuch sinashadi.