Португалиялик таниқли агент Паулу Барбозанинг ҳисоблашича, «Ан-Наср» клубининг 41 ёшли ҳужумчиси Криштиану Роналду 2026 йилги Жаҳон чемпионатида Португалия терма жамоасига фойда келтирмайди. Экспертнинг фикрига кўра, миллий жамоанинг ўйини фақатгина юлдузли форвард атрофига қурилади ва бу ҳолат жамоанинг тактик имкониятларини чеклаб қўяди.
«Криштианусиз Португалия ҳужумда ранг-барангроқ ўйин кўрсатади, у билан эса қарорлар қабул қилиш доираси тораяди. Шу сабабли, Роналду ҳозирги вақтда жамоа учун фойдадан кўра кўпроқ бош оғриғи, деб ҳисоблайман», — дейди эксперт.
Португалияликлар мундиалдаги юришларини 17 июнга белгиланган ДР Конго терма жамоасига қарши ўйин билан бошлашади. Гуруҳ босқичининг қолган икки учрашувида Роналду жамоаси Ўзбекистон ва Колумбия терма жамоалари билан куч синашади.
