«Barselona»ning sobiq futbolchisi va murabbiyi Xavi Ernandes o‘zi birga to‘p tepgan eng yaxshi o‘yinchilardan iborat kichik jamoa tuzdi.

Afsonaviy sobiq yarim himoyachi darvozadan Viktor Valdesga joy ajratgan bo‘lsa, yagona himoyachi sifatida Karles Puyolni tanladi, deb xabar beradi Barca Universal.

Yarim himoyachilar orasida klub tarixidagi eng muvaffaqiyatli davrda «ko‘k-anorranglilar» maydoni markazida Xavining o‘zi bilan mashhur uchlikni tashkil qilgan Andres Inyesta va Serxio Buskets e’tirofga sazovor bo‘lishdi. Hujumdan esa, tabiiyki, Lionel Messi joy oldi.

Xavi «Barselona»ning asosiy jamoasida 1998 yildan 2015 yilgacha to‘p surgan, shundan so‘ng «Al-Sadd»ga o‘tib, u yerda to‘rt yildan keyin faoliyatini yakunlagan edi. 2021 yildan 2024 yilgacha ispaniyalik mutaxassis Kataloniya grandida bosh murabbiy sifatida faoliyat olib bordi.