«Manchester Siti» klubi «Nottingem Forest» yarim himoyachisi Elliot Anderson transferi bo‘yicha juda yirik miqdorda taklif yubordi. Jami bonuslar bilan qo‘shib hisoblaganda, ushbu kelishuv qiymati 140 million yevroga yetishi mumkin. Bu haqda taniqli insayder David Ornshteyn xabar bermoqda.

Manbaning ma’lum qilishicha, «shaharliklar»ning «o‘rmonchilar»ga qilgan hozircha og‘zaki taklifi 106 million funt sterlingni (taxminan 123 million yevro) tashkil etmoqda. Shartnomada ko‘zda tutiladigan turli bonuslar bilan esa ushbu summa 120 million funt sterlingga (140 million yevro) yetishi ko‘zda tutilgan.

Qayd etilishicha, ayni damda «Nottingem Forest» rahbariyati ehtimoliy bonuslarga bog‘lanib qolishni istamayapti. Klub rahbarlari Britaniya transfer rekordini yangilaydigan mazkur mablag‘ning barchasini kafolatlangan holda (ya’ni naqd pul shaklida) oldindan olishni talab qilmoqda. Tomonlar o‘rtasidagi muzokaralar davom etmoqda.