«Манчестер Сити» клуби «Ноттингем Форест» ярим ҳимоячиси Эллиот Андерсон трансфери бўйича жуда йирик миқдорда таклиф юборди. Жами бонуслар билан қўшиб ҳисоблаганда, ушбу келишув қиймати 140 миллион еврога етиши мумкин. Бу ҳақда таниқли инсайдер Давид Орнштейн хабар бермоқда.
Манбанинг маълум қилишича, «шаҳарликлар»нинг «ўрмончилар»га қилган ҳозирча оғзаки таклифи 106 миллион фунт стерлингни (тахминан 123 миллион евро) ташкил этмоқда. Шартномада кўзда тутиладиган турли бонуслар билан эса ушбу сумма 120 миллион фунт стерлингга (140 миллион евро) етиши кўзда тутилган.
Қайд этилишича, айни дамда «Ноттингем Форест» раҳбарияти эҳтимолий бонусларга боғланиб қолишни истамаяпти. Клуб раҳбарлари Британия трансфер рекордини янгилайдиган мазкур маблағнинг барчасини кафолатланган ҳолда (яъни нақд пул шаклида) олдиндан олишни талаб қилмоқда. Томонлар ўртасидаги музокаралар давом этмоқда.
