Fransiya terma jamoasi bosh murabbiyi Didye Desham faoliyati davomida Madridning «Real» klubi ustoziga aylanishi mumkin bo‘lgani haqida gapirib berdi. Bu haqda Madrid Extra nashri xabar bermoqda.
«Men «Real»ning short-listidan (nomzodlarning qisqa ro‘yxati) joy olgan edim. O‘g‘lim bu haqda menga hazil qilib gapirgani yodimda, chunki bu voqea va muzokaralar ikki yil davomida cho‘zilgan edi», — deya Deshamning so‘zlarini keltirmoqda matbuot.
Ma’lumot uchun, Didye Desham 2012 yildan buyon Fransiya milliy terma jamoasini boshqarib kelmoqda. Uning qo‘l ostida «uchranglilar» 2018 yilgi Jahon chempionatida hamda 2021 yilgi Millatlar ligasida g‘oliblikni qo‘lga kiritishgan.
Shuningdek, fransuzlar uning boshqaruvida Yevro-2016 va JCH-2022 turnirlarining finaliga qadar yetib borishgan. Desham murabbiylik faoliyati davomida terma jamoadan tashqari «Monako», «Yuventus» va «Marsel» klublarida ham muvaffaqiyatli faoliyat yuritgan.
