Madridning «Real» klubi yarim himoyachisi Eduardo Kamavinga shu yozgi transfer oynasida jamoasini o‘zgartirishi mumkin. Bu haqda taniqli insayder va jurnalist Alfredo Pedulla xabar bermoqda.

Manbaning bergan ma’lumotlariga ko‘ra, Madrid grandi rahbariyati fransiyalik futbolchini mazkur transfer oynasida sotib yuborish variantlarini faol ko‘rib chiqmoqda. «Qaymoqranglilar» futbolchi uchun so‘ralayotgan transfer bahosini 50 million yevrogacha tushirishgan. Aytish lozimki, bundan avvalroq «Real» o‘z yarim himoyachisini 80 million yevrodan kam bo‘lmagan mablag‘ evaziga qo‘yib yuborishga tayyor ekani haqida xabarlar tarqalgan edi.

Ma’lumot uchun, Eduardo Kamavinga 2021 yilda Fransiyaning «Renn» klubidan 31 million yevro evaziga Madridga ko‘chib o‘tgan edi. Uning klub bilan amaldagi shartnomasi 2029 yilning 30 iyuniga qadar mo‘ljallangan.

Ortda qolgan 2025/26 yilgi mavsumda 23 yoshli yarim himoyachi «Real» tarkibida barcha musobaqalarda 43 ta uchrashuvda maydonga tushib, o‘z hisobiga 2 ta gol va 1 ta golli uzatma yozdirib qo‘yishga muvaffaq bo‘ldi. Tomonlar o‘rtasidagi vaziyatni Yevropaning bir qator yetakchi klublari diqqat bilan kuzatib bormoqda.