Мадриднинг «Реал» клуби ярим ҳимоячиси Эдуардо Камавинга шу ёзги трансфер ойнасида жамоасини ўзгартириши мумкин. Бу ҳақда таниқли инсайдер ва журналист Альфредо Педулла хабар бермоқда.

Манбанинг берган маълумотларига кўра, Мадрид гранди раҳбарияти франциялик футболчини мазкур трансфер ойнасида сотиб юбориш вариантларини фаол кўриб чиқмоқда. «Қаймоқранглилар» футболчи учун сўралаётган трансфер баҳосини 50 миллион еврогача туширишган. Айтиш лозимки, бундан аввалроқ «Реал» ўз ярим ҳимоячисини 80 миллион евродан кам бўлмаган маблағ эвазига қўйиб юборишга тайёр экани ҳақида хабарлар тарқалган эди.

Маълумот учун, Эдуардо Камавинга 2021 йилда Франциянинг «Ренн» клубидан 31 миллион евро эвазига Мадридга кўчиб ўтган эди. Унинг клуб билан амалдаги шартномаси 2029 йилнинг 30 июнига қадар мўлжалланган.

Ортда қолган 2025/26 йилги мавсумда 23 ёшли ярим ҳимоячи «Реал» таркибида барча мусобақаларда 43 та учрашувда майдонга тушиб, ўз ҳисобига 2 та гол ва 1 та голли узатма ёздириб қўйишга муваффақ бўлди. Томонлар ўртасидаги вазиятни Европанинг бир қатор етакчи клублари диққат билан кузатиб бормоқда.