Koreya terma jamoasi JCH-2026 guruh bosqichi uchrashuvida Chexiya ustidan 2:1 hisobida g‘alaba qozondi. O‘yin Meksikaning Sapopan shahridagi “Estadio Akron” stadionida bo‘lib o‘tdi.

Birinchi bo‘limda gol urilmadi. 59-daqiqada chexiyalik Ladislav Kreychi bosh bilan gol urib, hisobni ochdi. Koreyslar tez fursatda javob qaytarishni uddalashdi. 67-daqiqada Xvan In Bom o‘z nomini tabloga yozdirib qo‘ydi.

77-daqiqada chexlar ikkinchi to‘pni kiritishgandi, biroq VAR Tomash Souchekning golini ofsayd sababli bekor qildi. 80-daqiqada Koreya terma jamoasi xavfli hujum bilan javob qaytardi va oldinga chiqib oldi — Xyon Gu O gol muallifiga aylandi.

Koreya 3 ochko jamg‘arib, "A" guruhida 2-o‘rinni egallab turibdi. Birinchi pog‘onadan esa ochilish o‘yinida JARni mag‘lub etgan (2:0) Meksika joy olgan. Chexiya va janubiy afrikaliklarda esa 0 ochkodan mavjud.