Fransiya terma jamoasi vingeri Usmon Dembele milliy jamoadagi sherigi Kilian Mbappe haqida fikr bildirib, «Real» hujumchisi ko‘p hollarda ortiqcha tanqidga uchrayotganini ta’kidladi.
«Odamlar unga nisbatan juda adolatsiz munosabatda bo‘lishdi. Biz Kilianni tanqid qilishga haddan tashqari berilib ketganmiz, holbuki u ajoyib futbolchi. Mbappe maydon tashqarisida ham juda yaxshi inson, men uni uzoq yillardan beri taniyman.
Ba’zida odamlar uni haddan ziyod qattiq tanqid qilishadi. Faqat gap Kilian Mbappe haqida ketayotgani uchun. Unga bunchalik qattiq munosabatda bo‘lish kerak emas. Agar xohlasa, butsasining bog‘ichini bog‘lasin. Xohlamasa, bog‘lamasin. Getrisini tortib yursin yoki pastga tushirib kiysin. Bularning barchasi ortiqcha!
Mbappe, avvalo, inson. Shu bilan birga, u favqulodda iqtidorga ega futbolchi. U bizning yetakchimiz, Fransiya terma jamoasi sardori va jamoamiz uchun juda muhim o‘yinchi», — dedi Dembele. Uning so‘zlarini Actu Foot nashri X ijtimoiy tarmog‘ida keltirdi.













