Germaniya milliy terma jamoasi futbolchilari Jahon chempionatiga tashrif buyurgan o‘z muxlislari uchun kutilmagan va oliyjanob harakatga qo‘l urishdi.
Mazkur xayrli tashabbus terma jamoa sardori Yozua Kimmix tomonidan ilgari surildi. AQSHda sayyohlar oqimi haddan tashqari ko‘payib ketgani sababli transport va aviaqatnovlar narxi keskin ko‘tarilib ketgan. Shundan so‘ng Kimmix muxlislarni moddiy jihatdan qo‘llab-quvvatlashga qaror qilgan va jamoadoshlari ham bu taklifni ma’qullashgan.
Bu yilgi Mundialning geografiyasi ancha keng va tarqoq bo‘lib, Germaniya terma jamoasi guruh bosqichi doirasida AQSHning Hyuston shahrida Kyurasao, Kanadaning Toronto shahrida Kot-d'Ivuar va Nyu-Jersida Ekvador terma jamoalariga qarshi maydonga tushadi. Narxlarning qimmatligi mana shunday uzoq masofali shaharlararo parvozlarda muxlislarga qiyinchilik tug‘dirishi aniq edi.
