Portugaliya terma jamoasi bosh murabbiyi Roberto Martines 2026 yilgi jahon chempionati yakunlanganidan so‘ng, jamoaning turnirdagi natijasidan qat’i nazar, o‘z lavozimini tark etadi. Bu haqda jurnalist Ben Jeykobs X ijtimoiy tarmog‘ida ma’lum qildi.
Manbaga ko‘ra, Martines shartnomasini uzaytirmaslik haqida qaror qabul qilgan. Uning Portugaliya futbol federasiyasi bilan tuzgan shartnomasi jahon chempionatidan keyin o‘z yakuniga yetadi.
Qayd etilishicha, mutaxassis Angliya Premyer-ligasiga qaytish variantiga ochiq, shu bilan birga boshqa bir terma jamoada ishlash ehtimolini ham istisno qilmayapti.
Roberto Martines faoliyati davomida «Suonsi», «Uigan Atletik», «Everton» klublari hamda Belgiya terma jamoasini boshqargan.













