Ispaniyaning «Sevilya» klubi Moskvaning «Spartak» jamoasi hujumchisi Manfred Ugaldega ko‘z tikmoqda. Bu haqda OrgulloBiri xabar bermoqda.

Xorijlik manbaning ma’lumotlariga ko‘ra, Ispaniya klubi 24 yoshli kosta-rikalik futbolchini sotib olishga jiddiy qiziqish bildirmoqda. Biroq, Ugalde uchun 15-20 million yevro olmoqchi bo‘lgan «Spartak»ning yuqori moliyaviy talablari bunga to‘sqinlik qilmoqda.

Ta’kidlanishicha, «Sevilya» buncha mablag‘ni to‘lashga tayyor, ammo butun summani bir yo‘la emas, bo‘lib-bo‘lib to‘lamoqchi. Bunday sxema esa barcha pulni birdaniga olmoqchi bo‘lgan «Spartak»ni qoniqtirmayapti.

«Sevilya» Ugaldeni tarkibni kuchaytirish uchun real variant deb hisoblaydi, biroq tavakkalchilikka qo‘l urmoqchi emas. Manbaga ko‘ra, transfer faqatgina Ispaniya klubi o‘z futbolchilarini sotishdan pul ishlab topsa yoki «Spartak» yon bosishga rozi bo‘lsagina amalga oshadi, chunki Ugaldening o‘zi Rossiyani tark etishni xohlamoqda.

2025/26 yilgi mavsumda hujumchi barcha turnirlarda 38 ta o‘yinda maydonga tushib, sakkizta gol urdi va to‘rtta golli uzatmani amalga oshirdi.