Shveysariya terma jamoasi 2026 yilgi Jahon chempionati guruh bosqichi 1-turida Qatar bilan qayd etilgan durang (1:1) uchun revansh olish niyatida. Bu haqda Bosniya va Gersegovinaga qarshi o‘yin oldidan jamoa bosh murabbiyi Murat Yakin ma’lum qildi.

«Biz ikki ochko yo‘qotdik. Ammo yakuniy vaziyatga keyinroq baho beramiz. Agar g‘alaba qozonsak, hammasi ancha yaxshi ko‘rinish oladi. Biz o‘zimiz o‘rganib qolgan futbolni o‘ynashimiz va iloji boricha kamroq xatoga yo‘l qo‘yishimiz kerak. Raqibga bosim o‘tkazish, ularning himoyasini yuklama bilan ta’minlash va o‘z vaziyatlarimizdan foydalanish lozim», — deya murabbiyning so‘zlarini keltiradi FIFA matbuot xizmati.

«Agar ikkita, uchta yoki to‘rtta gol ura olmasang, aqlliroq harakat qilish kerak. Biz o‘tkazib yuborgan barcha gollar bir-biriga juda o‘xshash edi. Ehtimol, bizga himoyada qattiqqo‘lroq va ayyorroq harakat qilish kerakdir», — deya ta’kidladi murabbiy.

Shveysariyaliklar Bosniya va Gersegovina terma jamoasining asosiy ustunliklaridan biri bo‘lgan standart vaziyatlarga alohida e’tibor qaratishdi.

«Ular ham hujumda, ham himoyada standartlarda juda ishonchli harakat qilishadi. Biz bundan ogohlantirilganmiz va o‘z darvozamiz oldida ortiqcha vaziyatlarga yo‘l qo‘ymaslikka harakat qilamiz», — dedi Yakin.

«B» guruhi 2-turidan o‘rin olgan Shveysariya va Bosniya va Gersegovina o‘rtasidagi uchrashuv 18 iyun kuni Los-Anjelesda bo‘lib o‘tadi va Toshkent vaqti bilan soat 23:59'da boshlanadi. Har ikki terma jamoa hisobida 1 tadan ochko mavjud.