«Marsel» hujumchisi Meyson Grinvudning yana Angliyaga qaytishi mumkinligi haqida xabarlar tarqalmoqda.

L'Equipe nashrining xabariga ko‘ra, Londonning «Arsenal» klubi «Manchester Yunayted»ning 24 yoshli tarbiyalanuvchisini o‘z safiga qo‘shib olish imkoniyatini ko‘rib chiqmoqda. Fransiya klubi moliyaviy feyr-pley bilan bog‘liq muammolar sababli o‘z yulduzi bilan xayrlashishga majbur bo‘lishi mumkin, biroq buning uchun taxminan 80 million yevro talab qiladi.

Yakunlangan mavsumda Meyson Grinvud «Marsel» safinda barcha turnirlarda 45 ta o‘yinda maydonga tushib, 26 ta gol va 11 ta golli uzatmani o‘z hisobiga yozdirib qo‘ydi. Transfermarkt portali ekspertlari ingliz futbolchisining transfer bahosini 55 million yevroga baholashmoqda, uning amaldagi shartnomasi esa 2029 yilning o‘rtalariga qadar mo‘ljallangan.