«Barselona» yarim himoyachisi Mark Bernal Madridning «Atletiko» klubi hujumchisi Xulian Alvaresni o‘z jamoasida ko‘rishni istashini tan oldi. 19 yoshli ispaniyalik futbolchi «Kamp Nou»da «matraschilar»ning argentinalik forvardi bilan birga to‘p surish istagini ochiqchasiga bildirgan «ko‘k-anorranglilar»ning yagona vakili emas.
«Barselona»da qaysi futbolchini ko‘rishni istagan bo‘lardim? Xulian Alvaresni. Unga qarshi maydonga tushishni esa umuman xohlamasdim», — deya Bernalning so‘zlarini keltiradi Ispaniya OAVlari.
Alvares Kataloniya grandining asosiy transfer maqsadi hisoblanadi, biroq «Atletiko» 26 yoshli futbolchini qo‘yib yuborishni istamayapti va u uchun juda katta, to‘lab bo‘lmas miqdorda mablag‘ talab qilmoqda.
