Oq uy ishchi guruhi va JCH-2026 tashkiliy qo‘mitasi rahbari Endryu Juliani AQSH barcha mehmonlar xavfsizligini ta’minlash va ularda ijobiy taassurotlar qoldirish uchun bor kuchi bilan harakat qilayotganini ma’lum qildi.

«Biz odamlar o‘zlarini aziz mehmondek his qiladigan va Jahon chempionatidan zavq oladigan mana shunday ajoyib futbol turnirini o‘tkazishni istaymiz. Bunda biz nafaqat AQSH fuqarolari, balki bu yerga tashrif buyuradigan barcha xalqaro mehmonlarning xavfsizligi haqida qayg‘uramiz.

Shuni aytishim mumkinki, maxsus xizmatlarimiz yil boshidan buyon ishni kuchaytirishgan. Biz har soatda aloqada bo‘lib turibmiz. Ammo ayni paytda hech qanday tasdiqlangan tahdidlar mavjud emas. Hammasi rejadagidek ketmoqda. Maydondagi go‘zal o‘yinni kuzatish juda yoqimli bo‘ldi, hozirda asosiy suhbat mavzusi ham aynan mana shu, bu esa ajoyib. Menimcha, bu Amerikaning 250 yillik yubileyini o‘ziga xos tarzda nishonlashdir va Jahon chempionati ushbu bayramning bosh durdonasiga aylandi», — dedi Juliani.