Turinning «Yuventus» klubi shu yozgi transfer oynasida markaziy hujumchi chizig‘ini kuchaytirish niyatida.
La Stampa nashrining xabar berishicha, Turin grandi «Aston Villa» forvardi Temmi Abrahamni sotib olish variantiga jiddiy qiziqish bildirmoqda. Ingliz klubi o‘z futbolchisining transferini taxminan 25 million yevroga baholamoqda.
Ma’lumot uchun, Temmi Abraham «Chelsi» klubi akademiyasi tarbiyalanuvchisi hisoblanadi. U «Aston Villa» safiga 2026 yilning yanvar oyida Turkiyaning «Beshiktosh» klubidan 21 million yevro evaziga ko‘chib o‘tgan edi. Uning Birmingem klubi bilan shartnomasi 2031 yilning 30 iyuniga qadar mo‘ljallangan. Ortda qolgan 2025/26 yilgi mavsumda hujumchi barcha musobaqalarda jami 42 ta uchrashuvda maydonga tushib, o‘z hisobiga 16 ta gol va 4 ta golli uzatmani yozdirib qo‘ygan. Nufuzli Transfermarkt portali Abrahamning ayni paytdagi transfer qiymatini 18 million yevro deb hisoblamoqda.
