«Marsel» klubining 24 yoshli vingeri Meyson Grinvud Saudiya Arabistoni klublaridan kelib tushgan juda foydali va moliyaviy jihatdan baquvvat takliflarni rad etdi. Bu haqda insayder jurnalist Sasha Tavolyeri ma’lum qildi.
Manba bergan ma’lumotlarga ko‘ra, angliyalik futbolchini o‘z safiga qo‘shib olishga «Al-Ahli», «Al-Qodisiya» va «Al-Diriya» klublari urinib ko‘rishgan, biroq ularning barchasi rad javobini olgan. Futbolchi uchun kurashda Turkiyaning «Fenerbaxche» klubi qolmoqda. Istanbulliklar Grinvud bilan muzokaralarni davom ettirishmoqda va futbolchi bilan to‘liq kelishuvga erishishga intilishmoqda.
Ortda qolgan mavsum Grinvud uchun juda muvaffaqiyatli kechdi. Hujumchi barcha turnirlarda jami 45 ta uchrashuvda maydonga tushib, 26 ta gol urdi va 11 ta golli uzatmani o‘z hisobiga yozdirib qo‘ydi.
Transfermarkt mutaxassislari ayni paytda futbolchining transfer qiymatini 55 million yevroga baholashmoqda.
