Madridning «Real» klubi va Ispaniya terma jamoasi himoyachisi Mark Kukurelya 2026/27 yilgi mavsumdagi rejalari haqida gapirib berdi. Ushbu mavsum ispaniyalik futbolchi uchun «qaymoqranglilar» safidagi debyut mavsumga aylanadi.
«Mbappe va Vinisius uchun o‘zimni qurbon qilishga tayyorman. Jamoamiz g‘alaba qozonishi uchun bor "qora ishlarni" bajarishga tayyorman. Mening yagona maqsadim — faqat g‘alaba qozonish», — deya himoyachining so‘zlarini keltiradi insayder Fabrisio Romano X ijtimoiy tarmog‘idagi sahifasida.
Mark Kukurelya 2026 yilning 15 iyun kuni «Chelsi»dan «Real Madrid»ga rasman ko‘chib o‘tgan edi. Transfer summasi 55+5 million yevroni tashkil etdi. O‘zaro shartnoma olti mavsumga mo‘ljallangan bo‘lib, 2032 yilga qadar amal qiladi. Hozirda Kukurelya JCH-2026 musobaqasida ishtirok etish uchun Ispaniya terma jamoasi ixtiyorida bo‘lib turibdi.
