Angliya terma jamoasi vingeri Noni Madueke jamoadoshi Jud Bellingemning o‘yiniga yuqori baho berdi. Jahon chempionatining guruh bosqichida yarim himoyachi ikki bor FIFA tomonidan uchrashuvning eng yaxshi futbolchisi sovrinini qo‘lga kiritdi.

«Men uni jahon darajasidagi o‘yinchi deb hisoblayman. Har safar unga qaraganimda, taxminan bir xil futbolchini ko‘raman. Uning so‘nggi o‘yinlarda ko‘rsatayotgan natijalari hech kimni hayratda qoldirmasligi kerak — u buni ko‘p yillardan beri qilib kelmoqda. U shunday o‘ynaganda, bu men uchun mutlaqo normal holat», — deya Maduekening so‘zlarini keltiradi ESPN.

Shuningdek, Madueke Bellingem va Harri Keynni Angliya terma jamoasining ikkita asosiy o‘yinchisi sifatida ajratib ko‘rsatdi:

«Bu mas’uliyatni o‘z zimmasiga oladigan ikki futbolchi. Jud oxirgi uchrashuvda to‘xtatib bo‘lmas edi, Harridan esa doim gollar kutasan. Ularning bunday sport formasida ekani juda muhim — pley-offda ular bizga kerak bo‘ladi».

1 iyul kuni 1/16 final bosqichi doirasida Angliya terma jamoasi DR Kongoga qarshi maydonga tushadi.