Lissabonning «Sporting» klubi sardori Morten Yulmann faoliyatini Madridning «Atletiko» klubida davom ettirishga tayyor.

«Matraschilar» 27 yoshli futbolchi bilan shartnoma shartlari bo‘yicha kelishuvga erishdilar, deya xabar bermoqda Atletico Universe Portugaliyaning yirik nashrlariga tayangan holda. Endigi navbat klublarga — ular transfer tafsilotlarini o‘zaro kelishib olishlari kerak. Mavjud ma’lumotlarga ko‘ra, «Sporting» yarim himoyachi uchun taxminan 40 million yevro talab qilmoqda.

Morten Yulmann 2023 yildan buyon Lissabon jamoasi sharafini himoya qilib kelmoqda. O‘tgan mavsumda daniyalik futbolchi 45 ta o‘yinda maydonga tushib, o‘z hisobiga 3 ta gol va 6 ta golli uzatma yozdirib qo‘ygan.