Angliya terma jamoasini, kutilganidek, jahon chempionatining 1/8 finalida mahalliy terma jamoaga qarshi o‘yin oldidan Meksikada sovuq kutib olishdi. Jamoa mehmonxonaga yetib kelgan vaqtda yuzlab mahalliy muxlislar ingliz futbolchilarini hushtaklar bilan kutib olishdi, deb qayd etmoqda BBC.

O‘yinga bo‘lgan qiziqish yuqoriligi sababli rasmiylar xavfsizlik choralarini kuchaytirdi. Mehmonxona atrofiga polisiya xodimlari va Meksika Milliy gvardiyasi jangchilari joylashtirildi, tutash ko‘chalar esa to‘siqlar bilan yopildi.

Inglizlar Ekvador terma jamoasi bilan sodir bo‘lgan vaziyat takrorlanishidan qo‘rqib, yashash joylarini sir saqlashga harakat qilishgan edi. Meksikaga qarshi 1/16 final uchrashuvi oldidan Ekvador futbolchilari mehmonxona yaqinidagi shovqindan FIFAga shikoyat qilishgandi: meksikaliklar yarim kechasi karnaylar, mashina signallari va motosikllardan foydalanib, jamoaning uxlashiga xalaqit berishgan. Natijada ekvadorliklar turnir mezbonlariga 0:2 hisobida imkoniyatni boy berishdi.

Bundan tashqari, ob-havo sharoiti tufayli ham qo‘shimcha qiyinchiliklar yuzaga keldi. FIFA kutilayotgan momaqaldiroqlar sababli uchrashuv boshlanish vaqtini birdaniga 6 soatga surishni ko‘rib chiqdi, biroq Angliya futbol assosiasiyasi va Meksika futbol federasiyasi bilan muhokamalardan so‘ng vaqt o‘zgarishsiz qoldi.

Angliya jamoasi uchun yana bir sinov dengiz sathidan balandlik bo‘ladi. O‘yin dengiz sathidan taxminan 2240 metr balandlikda joylashgan shaharda bo‘lib o‘tadi. Kislorod miqdori pastligi sababli futbolchilarga jismoniy yuklamalarni ko‘tarish qiyinroq bo‘ladi.

Angliya va Meksika o‘rtasidagi 1/8 final uchrashuvi 6 iyul kuni bo‘lib o‘tadi va Toshkent vaqti bilan soat 05:00 da boshlanadi.