O‘z vaqtida Dortmundning «Borussiya» klubi va Germaniya terma jamoasida to‘p surgan Mats Xummels AQSH, Meksika va Kanada mezbonlik qilayotgan Jahon chempionati — 2026 musobaqasida Kabo-Verde terma jamoasi ko‘rsatgan o‘yinga munosabat bildirdi.
Orolliklar dunyo birinchiligining 1/16 finalida Argentina terma jamoasiga jiddiy muammolar tug‘dira olishdi. Lionel Skaloni shogirdlari 90 daqiqa ichida Kabo-Verde to‘sig‘idan o‘ta olishmadi — amaldagi jahon chempionlariga g‘alaba (3:2) uchun qo‘shimcha bo‘limlar kerak bo‘ldi.
"Kabo-Verde. Bu men hayotimda ko‘rgan yaqqol autsayder tomonidan ko‘rsatilgan eng hayratlanarli o‘yin bo‘ldi", — deb yozadi germaniyalik futbolchi o‘z ijtimoiy tarmoqlardagi sahifasida.
Eslatib o‘tamiz, Kabo-Verde terma jamoasi guruh bosqichida ham sensasiya qayd etib, Ispaniya bilan durang o‘ynagan edi (0:0). Shuningdek, afrikaliklar Urugvay (2:2) va Saudiya Arabistoni (0:0) bilan bahslarda ham mag‘lubiyatga uchrashmagandi.
